طريقه عمل بيتزا بالشوفان بالصور

بيتزا بالشوفان
السلام عليكم ورحمه الله وبركاته النهارده ان شاء الله هقدملكم طريقه عمل بيتزا بس مختلفه شويه عن البيتزا العاديه وصحيه واقل فالسعرات لانها بالشوفان وفي نفس الوقت لذيذه ومفيده للاطفال والكبار 🙂 يالا نبدأ:
المقادير:
-كوبر شوفان اي نوع انا استخدمت كويكر
-كوب دقيق ابيض أو ممكن اللي بيعملو دايت يحطو نص ابيض ونص اسمر
-علبه زبادي صغيره(100 جم) او معلقه اكل ونص زبادي
-معلقتين اكل زيت زيتون او اي زيت
-معلقه اكل حليب بودره ويمكن الأستغناء عنو
-معلقه صغيره خميره ومعلقه صغيره سكر
-ربع معلقه صغيره من كل من(زعتر ثوم بودر ملح) ويمكن الاستغناء عن الزعتر والثوم
ديه صوره للمقادير
مقادير بيتزا الشوفان
-وديه النكهات اللي استخدمتها عشان تدي طعم للعجينه (الزعتر والثوم والملح)وممكن طبعا نكتفي بالملح بس ونستغني عن الزعتر والثوم حسب رغبتكم
زعتر وثوم وملح
الطريقه:
-الأول هنطحن الشوفان بالكبه ونحاول نخليه ناعم علي اد ما نقدر
نطحن الشوفان
-تاني حاجه نخلط في كوبايه الخميره مع السكر مع شويه مايه دافيه(دافيه هاااا ههههه)مش سخنه ولا ساقعه عشان منموتش الخميره ونغطي عليهم ونسبهم 10دقائق يخمروا والصوره الجايه هتوضح شكلهم قبل وبعد التخمير
نخمر الخميره والسكر والميه
-نخلط المواد الجافه مع بعض(الدقيق الابيض والشوفان الحليب البودر )
شوفان ودقيق
-نضعهم في وعاء العجن ونضع عليهم الملح والثوم والزعتر ونحط الزبادي بس مش يكون ساقع يكون بره الثلاجه
نضع الزبادي ونعجن
-ونضيف معلقتين زيت الزيتون او اي زيت ونعجن علي سرعه هاديه او نفرك الخليط بأيدينا لو مفيش عجانه وهيكون بالشكل ده
نضع زيت الزيتون
–بعد كده نضيف الخميره اللي خمرناها قبل كده ونستمر بالعجن
نضيف الخميره ونعجن
-بعد كده نضيف ماء دافئ ونعجن وخلو بالكم هتاخد كميه صغيره جدا اقل من ربع كوبايه حسب نوع الدقيق فضيفو الميه بالتدريح واستمرو بالعجن لحد ما العجينه تلم ونعجنها كويس 7 دقائق بالعجانه او 10 دقائق بأيدينا
نعجن كويس
-هنا لمي اتعجنت كويس لحد ما فصلت عن جوانب الوعاء ومش بتلزق
العجينه اتعجنت
-ندهنها زيت ونغطيها ونسبها تخمر ساعه
ندهن العجينه زيت
-هنا اما خمرت بعد ساعه وحجمها تضاعف
العجينه خمرت
-نعمل بقي صلصه خفيفه نجيب طبق ونحط فيه صلصه طماطم جاهزه وملح وفلفل اسود وزعتر بس
ملح فلفل اسود وزعتر
-نفرد العجينه بالنشابه في صينيه مدهونه زيت ومرشوشه دقيق او علي ورق زبده مرشوش دقيق وانا بفضل التعامل مع ورق الزبده ونخرمها كويس بالشوكه
نفرد العجينه علي ورق زبده ونخرمها
-نضع صلصه الطاطم وبعد كده نحط قطع زبده صغيره نوزعها علي البيتزا طبعا الزبده اختياري بس انا بحب احطها لانها بتطري العجين جدا جدا ولو عاملين دايت بلاش زبده وبعد كده نحط اي حشو احنا عاوزينو انا هنا حطيت قطع شيدر ومودزريلا مبشوره وزيتون بس ممكن تحطو اي نوع لحوم او دواجن او اي حشو يعجبكم لو عاملين دايت استخدمو جبنه قليله الدسم وكميه قليله
بيتزا الشوفان بالجبن
-نكون مسخنين الفرن كويس جدا علي اعلي درجه قبل ما نحط البيتزا بعشر دقايق يعني ممكن نسيبها تخمر وهي مفروده العشر دقايق دول لحد ما نسخن الفرن وبعد كده نحطها علي الرف الوسطاني بالفرن بالكتير هتاخد من 6 ل 7 دقائق لو الفرن فعلا متسخن كويس وبعد كده نفتح الشوايه عليها تاخد لون حلو من فوق وده شكلها بعد السوا
البيتزا بالشوفان
-طبعا اللون الحلو ده والجبمه السايحه من الزبده اللي حطيناها 😉 وهنا لمي قطعتها
بيتزا الشوفان بالصور
-وهنا من تحت شايفين طريه ازاي ولونها جميل
بيتزا طريه
-البيتزا ديه ميزتها انها مفيده جدا للاطفال لان فيها شوفان وزبادي وحليب بودر ومفيش طفل مبيحبش البيتزا فكده هنكون بندخل للاطفال حاجه مفيده في اكله بيحبوها :)) جربوها هتعجبكم 🙂
والي اللقاء في موضوع اخر بأذن الله 🙂 في أمان الله 🙂

Post Author: Basma

مؤسس ومديرة الموقع الإلكتروني تيستي فوود

2 thoughts on “طريقه عمل بيتزا بالشوفان بالصور

    Nisrine

    (20 أغسطس، 2017 - 4:10 مساءً)

    فينا نعملها بدقيق الشوفان بس؟

      Basma

      (26 أغسطس، 2017 - 10:50 مساءً)

      الشوفان لوحده مش هينفع

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.