تيستي فوود

السلام عليكم ورحمه الله وبركاته النهارده ان شاء الله هقدملكم عجينه كلنا عارفينها او سمعنا عنها وهي بتتميز بأنها سهله وسريعه ونتيجتها رائعه وكمان ممكن تعملي بيها كل حاجه معجنات بيتزا سينابون  وهي عجينه العشر دقائق يالا نبدأ:
المقادير:(مقادير هذه العجينه تنقسم الي مجموعتين)
اولا مقادير المجموعه الأولي:
-كوب دقيق،كوب حليب دافئ(ممكن استبداله بالماء والحليب البودر)،معلقتين شاي خميره،معلقه شاي سكر،رشه ملح

علي فكره الكوبايتن اللي بالصوره فوق واحده عاديه بتاعت شاي والثانيه كوبايه معيار والاتنين اد بعض
ثانيا مقادير المجموعه الثانيه:
-كوب ونص دقيق،ربع كوب زيت،نصف معلقه صغيره بيكنج بودر

الطريقه:
-اولا نضع مقادير المجموعه الاولي(كوبايه الدقيق وكوبايه الحليب ومعلقتين الخميره ومعلقه السكر ورشه الملح) علي بعضهم في طبق او بوله

-ونقلبهم كويس جدا قوامهم هيبقي شبه الزلابيه او اتقل شويه

-وهنغطيها ونسيبها تخمر من 15 ل 20 دقيقه

-هنا بعد ما خمرت

-هنحط العجينه بعد ما خمرت في وعاء العجانه او طبق كبير لو هنعجن بأيدينا او علي رخامه براحتكم وهنضيف للعجينه مقادير المجموعه الثانيه (كوبايه ونص دقيق وربع كوب زيت ونصف معلقه صغيره بيكنج بودر)ضيفي الدقيق الاول والبيكنج بودر واعجني وبالاخر ضيفي الزيت واستمري بالعجن

-انا بعد ما ضيفت مقادير المجموعه الثانيه كانت العجين شكلها كده

-ده معناه ان العجين محتاج ماء هضيفلوا ماء دافئ واستمر بالعجن وممكن العكس ان العجين تلقوه سايل شويه تزودوه دقيق ده حسب نوع الدقيق هنا ضفتلو ميه وكملت العجن لحد ما العجينه بقت بالشكل ده انا عجنتها 7 دقائق علي العجانه لو بأيدك اعجنيها 15 دقيقه ممكن تعجنيها فتره اقل بس كلما زادت مده العجن  النتيجه هتبقي افضل

-وهسيب العجينه ترتاح تاني من 5 ال 10 دقايق واغطيها لحد ما اجهز الحشو(طبعا ممكن تشتغلي بيها علي طول عادي جدا بس انا بقولكم الطريقه اللي تديكوا افضل نتيجه
هنا غطتها وسبتها ترتاح من 5 الي 10 دقائق لحد ما جهزت الحشو


-نجهز الحشو انا استخدمت سجق صغير ده

-واستخدمت جبنه بيضاء حادقه وبيضه مخفوقه برشه ملح وسمسم لدهان الوجه
–
–هفرد العجين ومنساش ارش دقيق عشان العجين مش يلزق واحط الحشو والف مره واحده والصوره هتوضح الفكره

-واقطع العجين بالسكين وبعدين اقطعها وحدات وادهن وشها بالبيض وارش سمسم والصوره هتوضح برضو

-ولمي اخلص الكميه كلها اسيبها ترتاح في الصاج قبل الخبز خمس او عشر دقايق ممكن تسويها علي طول بس برضو لمي تسبيها ترتاح هتديكي نتيجه افضل(انا حشيت جزء جبن وجزء سجق)
والصوره ديه هتوضح الفرق بين قبل وبعد تخمير العجينه

-وعملت شكل مختلف بالجبنه وهو مشهور اكتر بالعجوه بس محدش عندي بيحب العجوه فعملتو بالجبنه والصور هتوضح طريقه عمله

-هنسخن الفرن قبل ما نخبز العجين بربع ساعه علي حراره متوسطه وهنحط المعجنات بالرف الاوسط من الفرن وهي خمرانه كويس والفرن متسخن قبلها فمش هتاخد منك عشر دقايق هتلقوها احمرت من تحت افتحوا الشوايه عليه لحد ما تاخد لون من فوق
هنا اول ما طلعت من الفرن

-وهنا وقت التقديم

-وده الشكل الثاني اللي عملته

-شايفين من جوه هشه وطريه ازاي

   –  والي اللقاء في موضوع اخر بأذن الله 🙂 في أمان الله 🙂