تيستي فوود

  خطوات عمل السمك البلطي المقلي

 المقادير:
-عدد 6 حبات سمك بلطي صغير كان وزنهم كيلو و 400 جم
-من 6 ل 7 فصوص ثوم
-نص حبه فلفل رومي كبيره او حبه صغيره
-ليمونه  او ليمونه ونص حسب حجم الليمونه
-معلقتين خل
-معلقه ونص ملح
-ربع معلقه صغيره فلفل اسود
-معلقتين صغيرين ممليين كمون
-معلقتين صغيرين مملين كزبره
-معلقه صغيره بابريكا
-ربع معلقه صغيره كركم
ديه صوره المقادير بس ازازه الخل مغطيه الملح والفلفل والكمون  :((
:
الطريقه:
-هنضف السمك كويس جدا أنا بخلي الراجل ينضفهولي وانا بعيد عليه بسيط وننضف جواه كويس وبنقعو شويه في ميه فيها ملح ولمون ودقيق وبعدين اشطفوا وانشفو بمنديل

-نضرب كل مكونات التتبيله في الكبه كويس جدا وده هيكون شكلها بعد الضرب

-نتبل السمك بالتتبيله ديه من بره ومن جوه كويس جدا(ومش ننسي قبل ما نتبلو نعملو شقوق بالسكينه كويس عشان يشرب التتبيله ويبقي اللحم من جوه متبل) ونغطيه كويس عشان مييسربش ريحه بالثلاجه وندخله الثلاجه علي الاقل ساعتين عشان ياخد طعم التتبيله

-هنا بعد ما طلع من الثلاجه انا سبتو يجي 4 ساعات
طبعا متغطي ومشبر من الثلاجه فالصوره مدغمشه 🙂

-هجيب طبق او ورقه زبده او الومنيوم افضل عشان اما نخلص نرميها اسهل من الغسيل :)) ونحط فيها دقيق ونتبله بحبه ملح وكمون  وكركم وفلفل اسود مش كتير

-ونقلب الدقيق كويس في بعضو

-نحط السمك فيه

-نقلبو علي الجانب التاني علي اساس يتغطي كويس بالدقيق من الجانبين

-هنا اما خلصت الكميه كلها

-نيجي بقي لاخر مرحله وهي القلي هنسخن زيت غزير  كويس لازم يكون سخن وممكن نختبروا باننا نحط طرف السمك فيه لو عملت تششش يبقي سخن بس نسخنو مش نحرقوا 😀
ونقلي السمك ممكن نقليه اتنين اتنين او ثلاثه ثلاثه حسب حجم المقلاه او الحله اللي هتقلي فيها انا بقلي في حله مش غويطه

-لمي ياخد لون نقلبو علي الناحيه الثانيه

-ولو عاوزينو كرسبي اكتر نديلو لون اغمق يعني ممكن تقلبوه كذا مره لحد ما ياخد اللون درجه اللون اللي عاوزينها ويكون كرسبي اكتر بس مش تزودوها عشان مينشفش زياده  ولازم نطلعو طبعا علي منديل يصفي الزيت الزايد ونقدمو في طبق التقديم وممكن نرش عليه شويه شطه بودر وكمون ورشه ملح وده حسب اختيارك وممكن تحطو الشطه فالتتبيله بس انا مش بحطها عشان الاطفال لو مفيش اطفال هياكلوه منو وانتو بتحبو الشطه حطوها في البدايه فالتتبيله وبألف هنا وشفا :))

-وطبعا بيتقدم مع رز السمك وسلطه خضرا
طريقه الرز:
-بنحمر بصلايه متقطعه صغير بزيت كتير لحد ما لونها يبقي غامق كل ما زودتي اللون كل ما الرز يغمق اكتر يعني بتحددي لون الرز اللي عاوزاه بدرجه لون وتحمير البصله وبعدين ممكن تدلقي الزيت الزياده لو فيه وتحطي شويه كمون وكركم ومعلقه صلصه طماطم وتحطي الرز المغسول والميه اد كميه الرز يعني لو كوبايه رز تحطي كوبايه ميه ومعلقه ملح لكل كوب رز ونسيب الميه تغلي وبعدين نوطي ونغطي علي الرز ونسيبو يستوي 20 دقيقيه وان شاء الله هبقي انزل الرز بالتفصيل بعد كده بس ده سريعا كده :)وممكن برضو تحطي علي الرز طماطمايه متقعه أو فلفل اخضر متقطع حسب ما تحبوا بس طبعا هنضيفهم قبل الرز لو هنحطهم وديه صوره للرز

والي لقاء في موضوع اخر بأذن الله 🙂 في أمان الله 🙂