محشي كرنب بالتفصيل مع خطوات سلق الكرنب بالصور

19 أغسطس

محشي كرنب بالتفصيل مع خطوات سلق الكرنب بالصور

السلام عليكم ورحمه الله وبركاته النهارده ان شاء الله هقدملكم اكله حبيبه الملايين وهي محشي كرنب :))
هنتكلم الاول عن سلق الكرنب وتقطيعه بالخطوات وبعدين نبدأ بالخلطه قبل ما نتكلم عن سلق الكرنب عاوزين نتفق علي شويه حجات واحنا بنقي الكرنب من السوق او السوبر ماركت خصوصا للناس المغتربين زيي 🙁 لان في مصر الكرنب حلو
اهم حاجه اننا نختار الكرنبه البيضاويه مش المدوره لان المدوره بتكون للسلطه او الكول سلو فنختار البيضاويه اللي بتكون وزنها اخف لان اللي وزنها تقيل ديه بتكون مليانه عروق من جوه ومش هتكون حلوه ونحاول نختار اللي لونها اخضر مش ابيض كده الحمد الله اشترينا الكرنب 🙂 مننساش بقي نجيب الخضره معانا بالمره 😀 يالا كفايه رغي ونبدأ بالمقادير 🙂
المقادير:
اولا مقادير سلق الكرنب:
-كرنبه-معلقه صغيره ملح-معلقه صغير كمون
ثانيا مقادير خلطه المحشي:
-كوبان ارز مصري
-حبتين طماطم
-حبيتين متوسطتين بصل
-نصف حزمه من كل من (كزبره -شبت-بقدونس)
-عودين نعناع اخضر فريش
-ثلاثه معالق صغيره ملح
-نصف معلقه فلفل اسود
-معلقه صغيره من كل من (كزبره ،كمون)
-نصف معلقه صغيره من كل من (زنجبيل -كركم-بابريكا)
-رشه قرفه
الطريقه:
هنبدأ بطريقه سلق الكرنب وديه المقادير الكرنبه زي ما انتو شايفين حجمها وسط

-هنجيب حله حجمها اكبر من الكرنبه ونحط فيها معلقه ملح ومعلقه كمون ونخلي الميه تغلي

-واكون محضره جنب الحله اللي فيها ميه بتغلي مصفاه وتحتها حله

-لحد ما الميه تغلي هشطف الكرنبه من بره كويس بالميه وهجيب الكرنبه وادخل السكينه حوالين راسها اغرزها كويس لجوه علي حواف راس الكرنبه وانزل السكينه تحت علي قد ما اقدر

-ولمي الميه تغلي هحط الكرنبه زي ما هي في الميه المغليه واحاول انزلها تحت علي اساس انها تكون كلها فالميه المغليه انا نزلتها بالضغط عليها بالسكينه

-بعد دقيقه كده او كام دقيقه لمي الورق الخارجي احسن انو طري(بس طري مش اتهري) هبدأ اشيل ورقه ورقه بأي ماسك عندي انا استخدمت مساكه الفحم في شيل الورق وطبعا حركه التفريغ حوالين راس الكرنبه ده هيساعدك في شيل الورق

-وهحط الورق اللي شيلتو في المصفاه اللي قلتلكم عليها

-وانا بشيل 3 او 4 ورقات وابدأ اغسلهم تحت ماء جاري واحطهم في طبق علي جنب عشان افضي المصفاه للورق الباقي

-وهكذا افضل اشيل ورقه ورقه بنفس الطريقه واغسل الورق وافضي المصفاه للورق الجديد لحححححححد ما اوصل لجوه الكرنبه 🙂

-كده خلصنا مرحله السلق فيه ملاحظه بالنسبه للسلق لو مش عندك حله كبيره قطعي ورقه ورقه قبل السلق واسلقيهم متقطعين واتبعي نفس الخطوات
-هنجيب بقي ورقه ورقه ونتنيها من النص بالشكل ده

-ونقطع العرق بالسكينه بالشكل ده

-ونقطع الورقه بالشكل ده مستطيلات رفيعه

-هنفردهم بقي هيكونو شرايط طويله نقطعهم بقي حسب حجم المحشي اللي عاوزينو بالشكل ده

-وهكذا وهكذا لحححد ما نخلص الاوراق كووولها انا مش عاوزاكو تزهقو ها احنا لسه في الاول هههههههههه واما نخلص الكميه كلها انا بحب احطها في مصفه واديها شطفه بالميه زياده تأكيد كده :))) وبعدين بحطهم في طبق واغطيهم انا بصراحه بفضل ادخلهم الفريزر قبل ما استعملهم بيكونو افضل واطري بس ده براحتك ممكن تستخدميهم علي طول
هنا حطتهم في طبق ودخلتهم الفريزر شويه ثلاثه ساعات تقريبا وممكن بقي تحفظوهم بالفريزر اسبوع او اتنين

-الحححححمد الله خلصنا المرحله الصعبه فمحشي الكرنب ندخل بقي فالتقيل 😀 قصدي ندخل فالسهل :))
-الخلطه بقي ديه مقادير خلطه المحشي

-وديه مقادير توابل الخلطه

-انا بحب اعمل الخلطه ني في ني افضل بالنسبالي اللي عاوز يسبك يسبك براحتكم الاول هضرب الطماطم فالكبه واحطها علي النار مع تقريبا ثلاثه ارباع علبه الصلصه اللي بالصوره واقلبهم واسيبهم علي النار يغلو واوطي النار عليها لحد ما تنشف ميتها خااالص

-هنا لمي ميتها نشفت شايفين مش بقي فيها ولا نقطه يه لاني مش عاوزه ميه خالص في خلطه المحشي

-وبعدين في نفس الكبه اللي ضربت فيها الطماطم من غير ما اغسلها هحط البصل فيها واشيل البصل احط الخضره فيها وبعدين هحط البصل والخضره علي الطماطم اللي نشفت ميتها

–وهحط عليهم التوابل واقلبهم كويس وبعدين في الاخر هحط عليهم كوبيتين شاي ارز مغسول ومتصفي مغسول فقط مش منقوع واقلب براحه عشان مش اكسر الرز

-شايفين خلطه المحشي لونها وشكلها ازاي ومش فيها ولا نقطه ميه

-هحضر الصينيه اللي هعمل فيها المحشي وافرشها من تحت بورق الكرنب اللي تقطيعو مش مظبط او الزايد او اللي فيه عروق بالشكل ده

-هبدا الف الورق زي الصوره

-وارص المحشي فالصينيه اعمل داواير كبيره بدايه من الحواف لجوه واحاول معملش فراغات بين الورق

-وهكذا لحد ما اخلص الصفوق الكوبايتين عملو معايا صفين ونص
-بعد ما اخلص رص الحله احط علي الوش نص معلقه سمن وممكن السمن تحطيها في الاول مع الخلطه مش هتفرق

بعد كده هحضر الشوربه انا كان عندي شوربه بط عملتو بيه وممكن تعمليه بأي شوربه وتكون متنكهه بملح وفلفل ولورا وحبهان بس مش تكون مالحه زياده لو الشوربه مالحه زياده قللو ملح خلطه المحشي واحط الشوربه بعد ما ادفيها علي النار علي المحشي انا حطتها بمصفاه عشان لو فيها حاجه مش تنزل فالمحشي حاجه زي ورق لورا بصل حبهان كده يعني

-هحط شوربه يادوب تكون علي حافه اخر صف مش تغطي اخر صف لا يادوب تلمسه زي الصوره

-واخليها تغلي

-لمي تغلي هغطي عليها واوطي عليها خالص ولو متعودين تحطو شياطه تحت الرز حطوا تحت المحشي ده حسب بوتجازكم انا عن نفسي بوتجازي نارو مش عاليه مش بستخدم الشياطه لا في الرز ولا في المحشي بس بوطي علي الاخر وسيبوه يستوي بياخد من 45 ل 55 دقيقه
-هنا بعد 50 دقيقه بالظبط كانت استوت الحمد الله 🙂

-عاوزين نتأكد نعمل الحركه المعتاده بتاعتنا ناخد واحده بالمعلقه كده هههههههههه

-وندوقها 🙂 مستويه والرز شايفين مفلفل ازاي مش معجن عشان مش كترنا لشوربه والطعم مش هقولكم عليه اكيد انتو عارفينو :))

-ونقلبو ونقدمو بالهنا والشفا لو عاوزين تقدموه مقلوب عشان يكون شكله حلو خلوه يهدي شويه مش تقلبوه سخن او اقلبوه ورصوه في طبق التقدبيم

اتمني اكون فدتكم فالموضوع ده ولو بمعلومه واحده :)) والي اللقاء في موضوع اخر بأذن الله 🙂 في أمان الله 🙂

Post Author: Basma

مؤسس ومديرة الموقع الإلكتروني تيستي فوود

48 thoughts on “محشي كرنب بالتفصيل مع خطوات سلق الكرنب بالصور”

nada

(18 فبراير، 2015 - 12:53 مساءً)

رد

اكيد استفت من حضرتك لانى مكنش ليا علاقه بالمحشى غير اكله بس أنتى قولتى طريقته ببساطه

Basma

(23 فبراير، 2015 - 8:02 صباحًا)

رد

تسلمي يجميل

ٲم ٲسماء

(19 مايو، 2017 - 8:14 صباحًا)

رد

طيب ايش البهارات؟

Buddy Eldaby

(10 نوفمبر، 2015 - 4:58 مساءً)

رد

انت حتة سكرة وعسلايه طريقة توصيلك للمعلومة هايله مشكورة كتير حبيبتى

منال

(15 مايو، 2015 - 9:02 مساءً)

رد

تسلم ايدك انا جربتها اليوم ان شاء الله تعجبهم

Basma

(5 يونيو، 2015 - 10:04 مساءً)

رد

تسلمي 🙂

سمية

(11 أغسطس، 2015 - 3:20 صباحًا)

رد

تسلمي الطريقة سهلة اوي أن شاء الله هجربه

ريمو

(29 يونيو، 2015 - 11:00 مساءً)

رد

الله عليكي عملتو قبل شويه وطعموا اه خراقه خرافه خرافه

أم الحلو

(14 يوليو، 2015 - 10:32 صباحًا)

رد

جزاك الله كل خيرا

استفدت جدا منه
شرح واضح ومبسط يفيد الكل
بنتي بتحبه كتير لكن معلوماتي بطريقة التحضير كانت ضئيلة
بإذن الله أعمله بأول فرصة

وكل عام وأنت بخير
ورمضان مبارك
وعيد سعيد

wafaa salem

(24 أغسطس، 2015 - 2:33 صباحًا)

رد

شرح جميل ومبسط يخليني اتشجع واجرب ..ميرسي ليكي

Moatz

(26 أغسطس، 2015 - 11:41 مساءً)

رد

متشكرين،انا متغرب وعايش وحدي وقررت اعمل المحشي،فكان من حسن حظي شرحكم للطريقه بالتفصيل ،حاجرب حالآ اشتريت كل المقادير،ويارب تطلع معايا كويسه عشان زهقت من السندوتشات

Yomna

(19 أكتوبر، 2015 - 11:03 مساءً)

رد

جزاكي الله كل خير الموضوع فادني جدا

soso

(10 نوفمبر، 2015 - 3:29 صباحًا)

رد

بجد شكرا عالتفصيل انا عملته بس الورق مش متقطع كويس والورق ابيض اوي وتخين تلف بصعوبه شكرا
صراحه قريته بالتفصيل ان شاءالله اكرر المحاةله تاني
ادتيني امل

هبة

(11 ديسمبر، 2015 - 7:19 صباحًا)

رد

تسلمى حبيبتى هاحاول اجازف واجرب وهاقول لك على النتيجة

saprina

(23 ديسمبر، 2015 - 5:01 مساءً)

رد

تسلم ايدك انا استفدت بالاخص مقدار الشوربة ربنا يكرمك

roro

(29 ديسمبر، 2015 - 9:29 مساءً)

رد

وصفتك طبقتها وعملت أجمل كرنب اكلو في حياتى حبيت أشكرك واقلك ربنا يجازيكي خير على وصفه جميله و الثواب أنك بتعلمي غيرك ربنا يكافئك كل خير شكرا جزيلا

Warda

(20 يناير، 2016 - 1:28 صباحًا)

رد

جربتها وطلعت راااااائعة البيت كله حباها
والطريقة واااضحة ماشاء الله عليك
تسلم ايديك وربنا يعطيك العافية

Hagar

(16 فبراير، 2016 - 3:09 مساءً)

رد

عملته بالخطوات دى خطوه بخطوه و يارب يطلع حلو ..تسلم يمناكى .كفيتى ووفيتى

Hagar

(14 مارس، 2016 - 2:39 مساءً)

رد

جزاكم الله خيرا..عملت المحشى لاول مره ف حياتى لطريقه دى و طلع تحفه 🙂

محمد

(12 مايو، 2016 - 12:27 مساءً)

رد

الف شكر

Gjdjlt

(23 مايو، 2016 - 6:27 مساءً)

رد

شكرا يعطيك العافيه عادي اعملها بدون لحمه

Hanan

(7 يونيو، 2016 - 10:02 صباحًا)

رد

الف شكر لك بس عند سوالين
هل ورق الورا هو ورق الغار
وكيف تضيفيه مطحون او تغليه وتاخذي مويته
و السؤال الثاني المحشي باللحم لو بضيف اللحم اطبخه شويه او لا

Sahar ramy

(18 سبتمبر، 2016 - 2:57 مساءً)

رد

تسلم ايدك انا عملتها ياارب تطلع حلوة

ناسينا

(20 سبتمبر، 2016 - 8:52 صباحًا)

رد

شكرا شكرا ياجميلة الله يجعلو في ميزان حسناتك كتيييير استفدت من الطريقة ولك دعاء في ظهر الغيب دمت بخير

ابتسام

(24 أكتوبر، 2016 - 4:22 مساءً)

رد

بجد روعه

Basma

(18 نوفمبر، 2016 - 11:19 مساءً)

رد

تسلمي

Madjid

(6 ديسمبر، 2016 - 10:35 مساءً)

رد

Thank you sister

Madjid

(6 ديسمبر، 2016 - 10:38 مساءً)

رد

شكرا على هذا الطبق الحلو

Mahraliza

(19 ديسمبر، 2016 - 11:21 صباحًا)

رد

جربتها وضبطت … يجزيك الف خير وشرحك رائع ..

السعيد

(28 ديسمبر، 2016 - 4:31 مساءً)

رد

بجد تسلمى
انا مغترب وكان يومى فى الطبيخ والكل طالب محشى
بس الحمد لله استفدت كتير من حضرتك
شكرا

Naeema

(29 ديسمبر، 2016 - 1:49 صباحًا)

رد

الصراحه انا عمري ما سويت ولا طبخت هالشي واحبه كثير ودورت في مواقع كثيره لكن ما حصلت ابسط طريقه عن هذي مشكوره كثير وجزاك الله خير طبعا بجربه باذن الله بكره واحلى سلام من سلطنه عمان 😊

Amira

(2 يناير، 2017 - 12:44 صباحًا)

رد

اول مرة اعمل محشي في حياتي، طريقة في منتها السهولة شكرًا

خديجه

(2 يناير، 2017 - 7:27 مساءً)

رد

شكله عجييب انا احب محشي وايد حبيت تسلم أيدج 😋😍❤

لهلوبة الجيزة

(3 يناير، 2017 - 11:40 صباحًا)

رد

هايل يا ست الكل، لو تعرفي كمان وصفة محشي الكرات أو كفتة الفريك (علي لبخار) بتاع جدتي يبقي كتر خيرك.

احمد

(2 فبراير، 2017 - 3:16 مساءً)

رد

يا بخت جوزك بيكي

سعاد

(12 فبراير، 2017 - 6:36 مساءً)

رد

تجنن حبيبتي ممكن طريقة عمل السبانخ و كيغ احتفظ بيها في الثلاجة

tofe

(26 مارس، 2017 - 12:02 مساءً)

رد

رااااااائعه الطريقه تسلم يدك على الطبخه وعلى الصور الواضحه اللي سهلت علي الطريقه وانا كنت شايفه انه مستحيل اقدر اعمله في حياتي لاني كنت افكر انه صعب جدا جدا بس انت سهلتي الوصفه جدا 👍🏻👍🏻👍🏻