تيستي فوود

السلام عليكم ورحمه الله وبركاته النهارده ان شاء الله هقدملكم كيكه الشيكولاته بصوص الشيكولاته الغني وكلو بالكاكاو الخام بدون شيكولاته خام 🙂 يعني هتكون خاماتها في متناول الجميع بأذن الله يالا نبدأ:
المقادير:
-اولا مقادير الكيكه:
-كوب وربع دقيق
-ربع كوب كاكاو خام
-عدد 2 حبه بيض
-كوب سكر
-نصف كوب زيت
-ثلاثه ارباع كوب حليب +معلقه اكل خل
-معلقه شاي بيكنج بودر+نص معلقه شاي بيكنج صودا
-ربع معلقه صغيره فانيليا
ديه صوره المقادير

-ديه الفانيليا والبيكنج بودر والبيكنج صودا

ملاحظه:اكيد بتسألو ايه فايده البيكنج صودا هو عموما لو ركزتوا فوصفات الكيك اللي بيكون فيها كاكاو هتلاقوها فيها بنسبه 90 في المائه بيكنج صودا ليه بقي لان الكاكاو طبيعته شويه انو ممكن يكتم الكيك فبيكون عاوز ماده رفع مساعده مع البيكنج بودر فعشان كده بنستخدم البيكنج صودا بسسس عشان نستخدم البيكنج صودا لازم تكون الوصفه فيها احماض يكون خل او زبادي او لبن رايب او حتي ليمون وحتي انتو لمي تيجو تختبروا البيكنج بودر بتحطو عليه نقطه مايه لو فار بيكون صالح للاستخدام ولو مش فار بيكون غير صالح للاستخدام طيب اما تيجو تختبروا البيكنج صودا مينفعش تختبروها بميه لانها مش هتفور لازم تختبروها بنقطه خل او ليمون ما علينا من الرغي الكتير ده هههههه  طيب السؤال بقي مينفعش نعملها من غير ببيكنج صودا لا ينفع هنشيل مقدار البيكنج صودا ونحط بيكنج بودر يعني بالوصفه ديه نحط معلقه ونص بيكنج بودر بس انا بقولكم الافضل
ثانيا مقادير صوص الشيكولاته
-نصف كوب كاكاو خام
نص كوب كريم شانيه(اللي بيكون في اكياس جاهزه مش الخام)
-نص كوب سكر
-نص كوب حليب
-معلقه اكل زبده
ديه مقادير صوص الشيكولاته والحليب باين انو بالكاكاو لاني عايرتو بنفس الكوبايه اللي عايرت بيها الكاكاو لكن هو حليب عادي والزبده مش صورتها هي بتكون معلقه اكل او اقل وغرضها انها تدي  لمعه للصوص بس

–
الطريقه:
-الاول قبل ما نبتدي في حاجه هنجيب كميه الحليب ونحط عليها معلقه الخل ونسيبها مع نفسها 10 دقايق او اكتر اللبن هيتحول زي الرايب كده او لو عندكم لبن رايب ممكن تستخدموه من الاول بدل الحليب والخل

-تاني حاجه هنفتح الفرن علي 180 ونحضر الصواني بتاعتنا انا استخدمت صينيتين كل واحده مقاس 20 عشان مقسمش الكيك في الاخر وممكن من الاول تستخدمو صينيه واحده مقاس اكبر وتقسموها نصين بعد السوا وتفرشوا الصواني بورق زبد وتدهنوها بزيت من الجوانب او تدهنوها كلها بزيت وبلاش ورق زبده حسب المتوفر عندكم

-ننخل الدقيق والكاكاو والبيكنج بودر والبيكنج صودا

-نحط البيض والفانيليا في وعاء الخفق ونضربهم شويه

-وبعدين ننزل عليهم بالسكر ونستمر بالضرب لحد ما قوامهم يكون فاتح كده

-وبعدين هننزل بالزيت بالراحه مع الاستمرار في الخفق وننزل بللبن ونضرب بس منكترش هي مرحله الضرب الكتير بتكون في البيض والسكر بس

–

-بعد كده بقي مش هنحتاج المضرب هنحتاج معلقه بس
هنضيف الدقيق المنخول مع الكاكاو والبيكنج صودا والبيكنج بودر وهنضيفهم علي دفعات ونقلب براحه بالمعلقه لحد ما الدقيق يختفي

-نحط خليط الكيك في الصواني وندخله الفرن الساخن مسبقا علي حراره 180 لمده تقريبا 40 دقيقه او اقل او اكتر حسب فرنك

-هنا لمي استوي بحط فيه سكينه لو طلعت نضيفه بعرف انو استوي

-اسيبو بقي يبرد لحد ما اعمل صوص الشيكولاته
نحط الكاكاو واللبن والسكر والكريم شانيه علي نار هاديه مع التقليب المستمر بمضرب سلك وادوبهم كويس واما يدوبوا اعلي النار اخليهم يغلو واقلبهم شويه لحد ما قوامهم يتقل شويه وبعدين اطفي عليهم واحط  معلقه الزبده واقلبهم عشان تدوب وكده الصوص يكون جاهز وبيكون تححفه بسس لاحظو اننا مش استخدمنا شيكولاته يعني اعتمدنا علي الكاكاو الخام فلاااازم يكون الكاكاو نوعو نضيف عشان الصوص يكون حلو ونصيحه بلاش الكاكاو بتاع العطار كتيير بيكون متخزن ومش حلو هاتو المعلب ماركه حلوه او اللي عند بتوع مستلزمات الحلويات بس اللي واثقين في حاجتهم

-هجيب طبقتين الكيكه واساويهم واحط علي كل طبقه كميه من صوص الشيكولاته وهو سخن عشان يطري الكيكه واحط الطبقتين فوق بعض

– واحط الصوص علي الكيكه من فوق واسيبو ينزل لوحدو يغطي جوانب الكيك  ويكون الصوص دافي لاسخن ولا بارد لانو لو برد هيجمد ومش هيديكي الشكل الانسيابي الجميل

-وزينيه بأي طريقه تعجبك انا بشرت شيكولاته ولزقتها بالجوانب

-وحطي بقي اي تاتش يعجبك :))

-وهنا من جوه شايفين الصوص عامل طبقه جميله ازاي

-وبالهنا والشفااا :)))

والي اللقاء في موضوع اخر بأذن الله 🙂 في أمان الله :))

–