كعب الغزال او المنين بالعجوه

السلام عليكم ورحمه الله وبركاته 🙂

النهارده ان شاء الله هقدملكم نوع من انواع المعجنات اللذيذه جدا وهي كعب الغزال او المنين بالعجوه بطريقه بسيطه وسهله يالا نبدأ 🙂

المقادير:

كوبان دقيق
نص كوب سمنه سايحه
معلقه صغيره خميره
معلقه ونص صغيره سكر
رشه ملح
نص كوب حليب قابل للزياده او النقصان حسب نوع الدقيق
حليب بودر وسمسم لدهان الوجه

ملاحظه:

والعجوه ديه انا عاملاها
مقاديرها:٣٠ حبه تمر
ربع كوب ماء
معلقه صغيره سمن
نحطهم كلهم علي النار لحد ما التمر يسيح وفي الاخر ندهنها من بره بالزيت عشان تتماسك

الطريقه:

نضع الدقيق ورشه الملح في بوله وننزل عليهم بالسمنه السايحه ( سايحه بس مش سخنه)

وممكن نحط كل المواد الجافه مع بعض الدقيق والملح والخميره والسكر بس هنا انا خمرت الخميره لوحدها

نبث الدقيق بالسمن بصوابعنا زي ما بنبث الكحك بس هنا مش هنبث كتير يادوب بس السمن تدخل في كل الدقيق

ندوب الخميره والسكر في شويه حليب دافي(دافي مش سخن ولا بارد)

هنا بعد تقريبا ٧ دقايق الخميره خمرت

نضع الحليب والخميره علي العجينه ونعجن

نفضل نزود فحليب دافي تدريجيا مع العجن لحد ما تتكون عندنا عجيبه ونزود الحليب بالتدريج ممكن تاخد مننا اقل او اكتر من نص كوب حليب حسب نوع الدقيق ومنعجنش كتير يادوب بس تتكون عجينه متماسكه نوعا ما احنا مش عاوزين نكون عرق بالعجينه

هنا العجينه من جوه مختلفه تمام عن عجينه البيتزا والفطاير تشبه عجينه الكحك بس ديه متماسكه اكتر

نفرد العجينه مستطيل طويل ومش تخين

نفرد العجوه عليها بالتساوي

نرولها زي السينابون

نقطعها بالسكينه قطع مش عريضه

نجحز دهان الوش

ده لبن بودره دوبته في شويه حليب صغيرين قوي قوامه لازم يبقي تقيل شبه الحليب المكثف وطبعا سمسم

وممكن نستبدل دهان الوش ببيضه ورشه فانيليا بس انا محبتش ادهنها بيض

هنا دهنا الوش

رشه سمسم

نرصها في صينيه مدهونه زيت او علي علي ورقه زبده ونسيبها تخمر نص ساعه

ندخلها فرن ساخن مسبقا حرارته ١٨٠ بتاخد تقريبا ١٠ دقايق او اقل وتحمر من تحت وبعدين نشغل عليها الشوايه بتاخد تحت الشوايه من ٥ ل عشر دقايق طبعا المده بتختلف من فرن للتاني

هنا بعد ما شغلت عليها الشوايه اسيبها تبرد جوه الفرن براحتها خااالص واما تبرد اطلعها من الفرن

هنا بعد ما بردت وبقت جاهزه للاكل 👍🏻 👍🏻 👍🏻

حلوه جدا ومقرمشه وطريه في نفس الوقت 😀 جربوها هتعجبكم باذن الله بالهنا والشفا ؛)

Post Author: Basma

مؤسس ومديرة الموقع الإلكتروني تيستي فوود

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *