تيستي فوود

السلام عليكم ورحمه الله وبركاته النهارده ان شاء الله هقدملكم وصفه سهله وبسيطه وطعمها راائع وهي الكبده المشويه بنكهه الفحم مع الصوص الاحمر الحار يالا نبدأ:
المقادير:
اولا مقادير الكبده:
-نصف كيلو كبده مقطعه شرائح رفيعه
-بصله كبيره مقطعه شرائح
-عدد ثلاثه فصوص ثوم مقطعه شرائح
-معلقه شاي ملح
-ربع معلقه شاي فلفل اسود
-نصف معلقه شاي بابريكا(فلفل احمر بارد)
-معلقه شاي شطه(حسب الرغبه)
-معلقه شاي كمون
-عصره نصف ليمونه
-مقدار غطاء خل
ديه صوره للمقادير

-ديه صوره الكبده هنحطها في مصفاه ونحط عليها ليمون ونشطفها بسيط بالماء(او انتي نظفيها او اغسليها براحتك وفي ناس مش بتغسل الكبده عشان قيمتها الغذائيه)

ثانيا مقادير صوص الطماطم الحار:
-حبتين طماطم
-نصف حبه فلفل رومي
-من 5 الي 6 حبات قرن فلفل اخضر حار او حسب الرغبه حسب ما بتحبو الحار
-(ملح -خل -كمون-رشه ثوم بودر وممكن الاستغناء عنها او استبدالها بفص ثوم )

الطريقه:
اولا طريقه الكبده المشويه:
-نخلط مكونات التتبيله مع بعض كويس (البصل والثوم والملح والفلفل والبابريكا والشطه والكمون والخل والليمون) ونضعهم علي الكبده وندعك الكبده كويس جدا بيهم ونغطيها بنايلون ونحطها بالثلاجه علي الاقل ساعه وممكن اكتر يكون افضل
–

   -بعد مرور ساعه او اكثر نطلع الكبده من الثلاجه  ونكون محضرين مقلاه تيفال ونضع فيها ماده دهنيه انا استخدمت سمن وممكن زيت حسب الرغبه ونسخنها كويس(جدا جدا) والتسخين ده مهم جدا عشان مش عاوزينها تنزل مايتها وتقلب مسلوقه عاوزينها تاخد صدمه ومتنزلش ميتها عشان تكون طريقه وطعمها جميل ونحط الكبده ونسيب النار عاليه شويه ونقلب وبعدين نوطي ونخليها تستوي هي مش بتاخد وقت كتير من 15 الي 20 دقيقه عشان مش تنشف وكمان مهم جدا ان كميه الكبده متبقاش كتيره علي الطاسه انا قسمت الكميه علي طاستين عشان الطاسه الكبيره بتاعتي باظت :(( عشان لو كميه الكبده كتيره علي الطاسه هتنزل ميتها وهتتسلق مش هتتشوي)

-كده تكون الكبده جهزت فاضل اخر خطوه بقي هي اللي هتديكي ريحه الشواء وهي انك تجيبي فحمه وتولعيها علي النار وبعدين تشيليها وتحطيها في ورق الومنيوم وتحطيها في نصف الكبده وتحطي عليها زيت عشان تطلع دخانها وتغطي بسرعه عليها لحد ميعاد التقديم(ملاااحظه انا مبحبش اعمل موضوع الفحمه ده كتير لانو غير صحي ممكن نعملو من فتره للثانيه بس مش علي
طول)

-كده تكون الكبده جهزت ودوقوا احلي كبده بنكهه الشواء تحححفه :))

-نيجي بقي للصوص الحار اللي هيكمل الطعم خصوصا لو انتو من عشاق الحار هنحط الطماطم والفلفل والفلفل الحار في الخلاط وممكن لو مش بتحبوا الحار مش تحطوا فلفل حار ممكن تكتفوا بالفلفل الرومي بس وتضربوا الخليط كويس بالخلاط  وبعدين نرفع الخليط علي النار ونحطلو خل في حدود ثلاثه معالق اكل خل ونزود ملح وكمون وممكن ذره ثوم بودر ومعلقه صلصه طماطم للون ونسيبوا شويه علي النار بس مش كتير وبكده يكون الصوص الحار جهز

-لتكمله الطعم بقي ممكن نجيب خبز لبناني ونقطعه زي الدوريتوس ونحمره في شويه زيت في طاسه تيفال او ندخله الفرن او نقليه براحتكم انا حمرتو في شويه زيت صغننين في تيفال وده اختياري انا بس بديكم افكار للتقديم

-انا قدمتها مع رز بللسان عصفور طريقتو زي الرز بالشعيريه بالظبط بس بدل الشعيريه لسان عصفور وكمان سلطه زبادي عشان تبرد الحار :))  وعملتها بطريقه بسيطه جدا(زبادي علي ذره ملح ونعناع ناشف ويتقلبو كويس بس كده) ومكس الحار والكبده المشويه والعيش المحمص والرز كان جااامد جدا جربوه وان شاء الله هيعجبكم وديه طريقه تقديمو


والي اللقاء في موضوع اخر بأذن الله 🙂 في أمان الله :))