طريقه عمل سمك بلطي مقلي

  خطوات عمل السمك البلطي المقلي
سمك بلطي مقلي
 المقادير:
-عدد 6 حبات سمك بلطي صغير كان وزنهم كيلو و 400 جم
-من 6 ل 7 فصوص ثوم
-نص حبه فلفل رومي كبيره او حبه صغيره
-ليمونه  او ليمونه ونص حسب حجم الليمونه
-معلقتين خل
-معلقه ونص ملح
-ربع معلقه صغيره فلفل اسود
-معلقتين صغيرين ممليين كمون
-معلقتين صغيرين مملين كزبره
-معلقه صغيره بابريكا
-ربع معلقه صغيره كركم
ديه صوره المقادير بس ازازه الخل مغطيه الملح والفلفل والكمون  :((
ملح وفلفل ولمون وخل كزبره كمون كركم:
الطريقه:
-هنضف السمك كويس جدا أنا بخلي الراجل ينضفهولي وانا بعيد عليه بسيط وننضف جواه كويس وبنقعو شويه في ميه فيها ملح ولمون ودقيق وبعدين اشطفوا وانشفو بمنديل
سمك بلطي
-نضرب كل مكونات التتبيله في الكبه كويس جدا وده هيكون شكلها بعد الضرب
تتبليله السمك المقلي
-نتبل السمك بالتتبيله ديه من بره ومن جوه كويس جدا(ومش ننسي قبل ما نتبلو نعملو شقوق بالسكينه كويس عشان يشرب التتبيله ويبقي اللحم من جوه متبل) ونغطيه كويس عشان مييسربش ريحه بالثلاجه وندخله الثلاجه علي الاقل ساعتين عشان ياخد طعم التتبيله
نتبل السمك
-هنا بعد ما طلع من الثلاجه انا سبتو يجي 4 ساعات
طبعا متغطي ومشبر من الثلاجه فالصوره مدغمشه 🙂
الثلاجه
-هجيب طبق او ورقه زبده او الومنيوم افضل عشان اما نخلص نرميها اسهل من الغسيل :)) ونحط فيها دقيق ونتبله بحبه ملح وكمون  وكركم وفلفل اسود مش كتير
دقيق قلي السمك
-ونقلب الدقيق كويس في بعضو
دقيق متبل
-نحط السمك فيه
سك بلطي
-نقلبو علي الجانب التاني علي اساس يتغطي كويس بالدقيق من الجانبين
السمك
-هنا اما خلصت الكميه كلها
السمك المقلي
-نيجي بقي لاخر مرحله وهي القلي هنسخن زيت غزير  كويس لازم يكون سخن وممكن نختبروا باننا نحط طرف السمك فيه لو عملت تششش يبقي سخن بس نسخنو مش نحرقوا 😀
ونقلي السمك ممكن نقليه اتنين اتنين او ثلاثه ثلاثه حسب حجم المقلاه او الحله اللي هتقلي فيها انا بقلي في حله مش غويطه
نقلي السمك
-لمي ياخد لون نقلبو علي الناحيه الثانيه
نقلب السمك
-ولو عاوزينو كرسبي اكتر نديلو لون اغمق يعني ممكن تقلبوه كذا مره لحد ما ياخد اللون درجه اللون اللي عاوزينها ويكون كرسبي اكتر بس مش تزودوها عشان مينشفش زياده  ولازم نطلعو طبعا علي منديل يصفي الزيت الزايد ونقدمو في طبق التقديم وممكن نرش عليه شويه شطه بودر وكمون ورشه ملح وده حسب اختيارك وممكن تحطو الشطه فالتتبيله بس انا مش بحطها عشان الاطفال لو مفيش اطفال هياكلوه منو وانتو بتحبو الشطه حطوها في البدايه فالتتبيله وبألف هنا وشفا :))
سمك بلطي مقلي
-وطبعا بيتقدم مع رز السمك وسلطه خضرا
طريقه الرز:
-بنحمر بصلايه متقطعه صغير بزيت كتير لحد ما لونها يبقي غامق كل ما زودتي اللون كل ما الرز يغمق اكتر يعني بتحددي لون الرز اللي عاوزاه بدرجه لون وتحمير البصله وبعدين ممكن تدلقي الزيت الزياده لو فيه وتحطي شويه كمون وكركم ومعلقه صلصه طماطم وتحطي الرز المغسول والميه اد كميه الرز يعني لو كوبايه رز تحطي كوبايه ميه ومعلقه ملح لكل كوب رز ونسيب الميه تغلي وبعدين نوطي ونغطي علي الرز ونسيبو يستوي 20 دقيقيه وان شاء الله هبقي انزل الرز بالتفصيل بعد كده بس ده سريعا كده :)وممكن برضو تحطي علي الرز طماطمايه متقعه أو فلفل اخضر متقطع حسب ما تحبوا بس طبعا هنضيفهم قبل الرز لو هنحطهم وديه صوره للرز
رز سمك
والي لقاء في موضوع اخر بأذن الله 🙂 في أمان الله 🙂

Post Author: Basma

مؤسس ومديرة الموقع الإلكتروني تيستي فوود

11 thoughts on “طريقه عمل سمك بلطي مقلي

    safaaibrahem

    (3 مارس، 2015 - 5:23 مساءً)

    تسلم الايادى على الاكلات ال تفتح الشهيه

      Basma

      (16 مارس، 2015 - 11:54 صباحًا)

      تسلمي يجميل

        بوسي خالد

        (28 مارس، 2016 - 3:31 مساءً)

        بجد تسلم ايدك

    essam youssry

    (27 يونيو، 2015 - 3:31 مساءً)

    جزاكى الله خيرا.

    ماجد

    (25 مارس، 2016 - 11:04 مساءً)

    احلا وصفة تسلم ايديك

    بوسي خالد

    (28 مارس، 2016 - 3:31 مساءً)

    تسلم ايدك بجد

    Shosho

    (2 سبتمبر، 2016 - 12:23 صباحًا)

    سويت الرز طلع يمي ربي يسعدك …

      Basma

      (7 سبتمبر، 2016 - 7:00 صباحًا)

      الف هنا وشفا

        yasmine

        (30 ديسمبر، 2016 - 3:55 صباحًا)

        تسلم ايدك

          yasmine

          (30 ديسمبر، 2016 - 4:04 صباحًا)

          انا عايزه اتابع الوصفه والصفحه
          بجد شجعتيني

            yasmine

            (30 ديسمبر، 2016 - 4:05 صباحًا)

            بس ازاي

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *