خطوات عمل البفتيك المقلي
المقادير:
-نص كيلو لحم بفتيك
-بصلتين متوسطين مقطعين شرايح
-اربع فصوص ثوم مقطعه شرايح
-نص ليمونه
-مقدار غطاء خل
-معلقه ملح
-ربع معلقه فلفل اسود
-ربع معلقه بابريكا
-ربع معلقه قرفه
-ربع معلقه بهارات لحم
طبعا معالق التوابل بتكون صغيره اللي هي معالق الشاي
خلطه البانيه:
-بيضتين-نص كوب لبن حليب،رشه ملح وفلفل اسود،بقسماط
ملاحظه:التوابل ممكن تغيريها براحتك حسب المتوفر عندك اهم حاجه والثابتين الملح والفلفل الأسود
الطريقه:
-هنغسل اللحم بالميه ونصفيه من ميتو
-ديه صوره المقادير هنا قطعنا البصل والثوم شرايح ومش نبشروا ولا ناخد ميتو كدا اسهل لان البصل والثوم هينزلو ميتهم لوحدهم وبعد كده هيكون من السهل اننا نشيل اللحم من التتبيله عشان نقليها
-هنحط مقادير التتبيله كلها علي بعض ونقلبها بأيدينا
-نحط التتبيلبه علي اللحمه ونقلبهم مع بعض
-نحطهم في كيس ونقفلو كويس وعلي فكره الكيس بيسرع التتبيل يعني لو مستعجله علي الحاجه وعاوزاها تتبل بسرعه حطيها في كييس وندخلها الثلاجه علي الاقل ساعتين ده اقل حاجه وكل ما زودتي المده هيكون احسن عشان اللحمه يبقي طعمها احسن واطري انا سبتها ليله كامله
-تاني يوم بقي او بعد ساعتين او 4 او حسب ما سبتيها بالتتبيله هنطلع اللحم ونجهز بقي الطبقه اللي هتلزق اللحم بالبقسماط وهي مقاديرها عباره عن بيضتين ونص كوب لبن ورشه ملح ورشه فلفل اسود
-هنحط اللبن والبيض ورشه الملح والفلفل علي بعض في طبق
-نقلبهم كويس جدا بالشوكه
-البقسماط بقي انا بستخدم الجاهز ده بصراحه بيدي نتيجه جميييله،انتو ممكن تستخدمو بقسماط عادي بس لو هتستخدمو بقسماط عادي اخلطوه بحبه دقيق صغيرين
-نحط البقسماط في الطبق وعليه يجي ربع معلقه صغيره ملح ورشه فلفل اسود وزي ما اتفقنا لو هنستخدم البقسماط السايب حطولوه حبه دقيق صغيرين ومعاه ملح وفلفل اسود وممكن بقي حبه توابل من اللي حطتوها علي اللحم بس انا بستخدم البقسماط الجاهز ده وبكتفي بتتبيله بملح وفلفل اسود فقط
-هقلب البقسماط في بعضه
-هنا كل حاجه عندنا بقت جاهزه البقسماط والبيض المخلوط بللبن واللحمه المتبله نبدأ بقي الشغل :))
-هننشل اللحم من التتبيله وهتلقيها بتتشال بسهوله جدا من اللتتبيله لاننا مقطعين البصل والثوم شرايح وهحط اللحم في خليط البيض و اللبن
-وهمسكها كده زي الصوره عشان تنزل البيض واللبن الزايد
-وبعدين هحط اللحم في خليط البقسماط
-واقلب اللحم علي الناحيه التانيه
-والخطوه المهمه هما اني اضغط علي اللحم كويس قوي قوي عشان مش تفك مني بالقليه واحطها بين ايدي الاتنين كأني بسقف عليها وهنا اما ضغطها كويس
-هنا خلصت الكميه كلها
-هنا بقي غلفتو وعندك حلين لو عاوزه تعمليه علطول حطيه بالفريزر نص ساعه لو محضراه بدري وقدامك اكتر من ساعه لحد ما تقليه خليه بالثلاجه ساعتين تلاته براحتك بقي حطيه بالثلاجه والخطوه ديه مهمه اوي انك تحطيه بالثلاجه عشان طبقه البقسماط مش تفك اما يتقلي انا حطيتو بالفريزر نص ساعه
-بعد نص ساعه هطلعوا من الفريزر عشان اقليه ومرحله القلي مهمه جدا برضو في نجاح البفتيك
نحط زيت غزير ونسخنو علي نار عاليه لازم يسخن كويس وممكن اختبرو اني احط فيه طرف بفتيك اذا عمل تشششش يبقي سخن كويس معملش استني عليه كمان شويه واجرب تاني عمل تششش تمام احط البفتيك
هنا حطيت البفتيك
-ااول ما احطوا اخلي النار متوسطه
-أما ياخد لون اقلبو علي الناحيه التانيه
-مجرد ما ياخد لون من الناحيتين هيكون استوي هطلعوا من الزيت بشوكه او مقصوصه
-نطلعهم علي مناديل عشان يمتص الزيت الزايد
-هيكون مقرمش من بره وطري من جوه ولو حابينو طري كلو او حسيتو نفسكم نشفتوه اول ما يطلع غطوه بورق الومنيوم هيطري
ويقدم بألف هنا وشفا :))
-قبل ما امشي بس من موضوع البفتيك عاوزين نتفق علي شويه حجات كده :)) عشان البفتيك مش يفك
-أما نحط البقسماط نضغط عليه كويس جدا
-لازم وضروري نحطو بالفريزر قبل القلي بنص ساعه أو بالثلاجه لو هنسيبو اكتر من ساعه
-لازم الزيت يكون سخن ويعمل تشششش 😀
وان شاء الله تدوقوا احلي طبق بفتيك 🙂
-والي لقاء في موضوع اخر بأذن الله 🙂 في أمان الله 🙂
طريقه عمل البفتيك المقلي
Post Author: Basma
36 thoughts on “طريقه عمل البفتيك المقلي”
نيفين
(1 ديسمبر، 2014 - 10:52 صباحًا)شكرا لك كثيرا بجد الموضوع رائع ولذيذ وسوف اقوم بعمله الان
Basma
(7 ديسمبر، 2014 - 7:41 صباحًا)تسلمس:))) وابقي طمنينا علي النتائج 🙂
ايمان
(7 يونيو، 2015 - 6:54 مساءً)بجد تسلم ايدك الاكلة جربتها وتلعط تحفة
Basma
(7 يونيو، 2015 - 7:25 مساءً)بالف هناااا
tota karim
(15 يناير، 2015 - 11:25 مساءً)Bgd f 7agat kteer mkontsh a3rafha 3shan kda mknsh betl3 m3aya mzboot thank you 3la alnsae7 algamela d
Basma
(19 يناير، 2015 - 10:04 صباحًا)تسلمي يجميل وان شاء الله يظب معاكي
شيمو
(5 أبريل، 2015 - 1:29 مساءً)طريقة جميلة وسهله بجربها الحين
شيمو
(5 أبريل، 2015 - 1:29 مساءً)تسلم ايدك
Basma
(5 يونيو، 2015 - 10:06 مساءً)تسلمي 🙂
mai
(25 أبريل، 2015 - 10:32 مساءً)الاكله حلوه بس انا مش بعرف اطبخ
Basma
(5 يونيو، 2015 - 10:06 مساءً)ليه بس جربي
zozaa
(4 مايو، 2015 - 6:47 مساءً)طب لو عاوزه اخزنه اعمل كل الخطوات بدون القلي واشيله بالفريزر
Basma
(5 يونيو، 2015 - 10:05 مساءً)اه بالظبط
ايمان
(7 يونيو، 2015 - 6:55 مساءً)بجد تسلم ايدك ع النصائح التحفة دى ويارب يطلع معايا كويس
Basma
(7 يونيو، 2015 - 7:25 مساءً)تسلمي
hany_sayed809@yahoo.com
(1 أغسطس، 2015 - 9:09 صباحًا)بجد كل الأكلات اللى بتقدميها اكثر من رائعة وبتمنالك التوفيق
noorteam
(3 نوفمبر، 2015 - 9:30 صباحًا)اكلة جميلة جدااااااا يسلم ايديك
haron
(13 نوفمبر، 2015 - 6:37 مساءً)شكرا لك كثيرا الطعام جمد
ايمان
(22 نوفمبر، 2015 - 12:22 صباحًا)بجد تسلم ايديكي حبيبتي لانك شرحتي بطريقه سهله وسلسه جدا يعني اللي ما طبخش ابدا يتعلم منك وجزاكي الله خيرا
Soha
(3 يناير، 2016 - 4:30 مساءً)متشكره جدا و هجربها و اقولك على النتيجه
أم جنة الله
(26 يناير، 2016 - 8:24 مساءً)جزاكى الله خيرا .. حقيقى شكرا وجزيتى طعام الجنة وجعله فى ميزان حسناتك ليوم الدين .. تسلم إيديكى على دقة الكلام والصور والتوضيحات اللة بين السطور 🙂
أم جنة الله
(26 يناير، 2016 - 8:25 مساءً)جزاكى الله خيرا .. حقيقى شكرا وجزيتى طعام الجنة وجعله فى ميزان حسناتك ليوم الدين .. تسلم إيديكى على دقة الكلام والصور والتوضيحات اللى بين السطور
رضا فائق عزيز
(14 فبراير، 2016 - 5:25 مساءً)طريقتك فى شرح تفاصيل الاكله ممتازه انا عاذب واقوم بعمل الاكل بنفسى و متابع لكل برامج الطهى فى الفصائيات لكن مشكلتى التفاصيل و التركات الصغيره ولكن انتى توضحى بطىيقه جميله و سلسه للغايه و تفتح النفس اشكرك على مجهودك و اتمنى لكى التوفيق رضا من الاسكندريه / مصر
رضا فائق عزيز
(14 فبراير، 2016 - 6:05 مساءً)ارجو كا اقتراح عمل باب مستقل لاكل العزاب يكون بسيط و سهل و خالى من التعقيدات
تينا
(26 أبريل، 2016 - 10:35 مساءً)ميرسي ياجميله
بس سوال هو ينفع اجهز الخلطه والتتبيله واحطه ف الفريزر واطلع منه وقت ما احب اقلي ع طول ؟
capo
(6 مايو، 2016 - 3:23 صباحًا)احلي حاجه في الموضوع كلو التيشششش
مؤمن
(29 يوليو، 2016 - 8:19 مساءً)طريقه جميله وبالتفصيل ربنا يبارك فيكم … أشكركم
Basma
(1 أغسطس، 2016 - 9:42 صباحًا)شكر
أحمد عبد العزيز
(9 أكتوبر، 2016 - 12:18 صباحًا)شكرا جدا لحضرتك
محمد ليثي
(13 أغسطس، 2016 - 7:30 مساءً)لازم يعمل تتشششششش هههه
عبدالرحمن
(15 أغسطس، 2016 - 5:55 مساءً)تسلمي على مجهودك الراااااااااااااائع
Fady
(29 أغسطس، 2016 - 10:05 صباحًا)هوا انا لازم اغلفه بقل ما احطه في الفريزر ؟
مرمر
(16 سبتمبر، 2016 - 2:37 صباحًا)ميرسي خالص علئ معلومت الثلاجة احناكنا بنعمل زئ ماقولتئ بالظبط ماعد معلوم الثلاجة وطلع تحفه عن الاول
Omda
(11 أكتوبر، 2016 - 2:07 صباحًا)كذب ادي الي يمشي ورا الستات ما يخلاش من الفسافيس
mo3taz
(12 نوفمبر، 2016 - 2:07 مساءً)طب انا مغترب طبعا وجبت الكيلو مش هعملوا كله
اخليه فى الفريزر واعمل كل مره الخطوات ولا اجهزه كله لحد مرحلة بعد البقسماط فى الفريزر لحد ما ابقي استخدمه بعد يوم 2 3 اسبوع ولا كدا يبوظ
هدى صلاح
(17 أبريل، 2017 - 9:19 مساءً)لو سمحتي ايه الطبق الآخر الذي يقدم مع البوفتيك ؟