خبز الصاج بالخطوات

خبز الصاج
ا
لسلام عليكم ورحمه الله وبركاته النهارده ان شاء الله هقدملكم خبز الصاج للسندوتشات او الشاورما او حتي يتاكل كده ويتغمس بيه قبل كده قدمتلكم خبز التورتيلا بس كان بالبيكنج بودر النهارده الخبز ده بالخميره يالا نبدأ 🙂
المقادير:
-كوب دقيق ابيض
-كوب دقيق أسمر(ممكن استبداله بالأبيض يعني من البدايه نستخدم كوبان دقيق ابيض)
-معلقه صغيره خميره فوريه
-معلقه صغير سكر
-معلقه صغيره ملح
-معلقتين كبار زيت(معالق اكل)
-معلقه أكل سمسم طبعا ديه اضافه ممكن تستغنوا عنها
ديه صوره للمقادير
المقادير
ا
لطريقه:
-الاول هنحط السكر والخميره في ربع كوبايه مايه دافيه(دافيه)مش سخنه ولا ساقعه عشان منقتلش الخميره
خميره وسكر
-ونغطيهم ونسبهم من عشر دقايق لربع ساعه يخمروا هنا بعد ما خمروا
الخميره خمرت
-نحط المواد الجافه علي بعض الدقيق والملح والسمسم وبعدين نضيف عليهم الزيت ونعجن بالعجانه علي سرعه منخفضه او نفركهم بأيدينا لحد ما الخليط يكون شبه الرمل
نخلط المواد الجافه
-ونضيف الميه والخميره ونعجن وبعدين نضيف ميه (دافيه) للعجينه بالتدريج ونستمر بالعجن لحد ما العجينه تلم معانا طبعا كميه الميه كميه تقريبيه حسب نوع الدقيق هي اخدت معايا بالتقريب نصف كوب اهم حاجه اننا نضيف الميه بالتدريج ونستمر بالعجن لحد ما العجينه تلم والوعاء اللي بعجن فيه ينضف يعني تتعجن بالعجانه 7 دقايق وبالأيد من 10 دقايق لربع ساعه
نعجن
-واحط العجينه في وعاء او طبق مدهون زيت وادهن العجينه بزيت من جميع الجوانب واغطيها واخليها تخمر ساعه تقريبا في مكان مفهوش هواء يعني جوه ميكرويف او فرن
ملاحظه لو العجينه لزقت منك ضيفي ليها شويه دقيق
اخمر العجين
-هنا بعد مروه ساعه العجينه خمرت اهي وحجمها تضاعف
العجينه خمرت
-هقسم العجينه ل تقريبا 5 او 6 كور في حجم حبه اليوسفي واغطيها واخليها تخمر تاني من نص ساعه لساعه
يوسفي
-هنا بعد مرور نصف ساعه العجينه خمرت
العجينه خمرت
-ركزوا معايا هنا بقي هجيب ورقه زبده واحط عليها دقيق وااجيب كوره من العجينه وافردها بالنشابه طبعا ارش دقيق علي النشابه عشان متلزقش بالعجين وافردها علي شكل دائره علي قدر الأستطاعه اعملها دائره وارفع العجين علي قد ما أقدر
العجين
افرد العجينه
شايفين سمك الخبز رفيع ازاي
سمك العجين

   -اشيل الرغيف اللي فردتو ده زي ما هو بورق الزبده واجيب ورقه زبده تانيه واكرر الخطوه اللي فاتت وهكذا لححد ما تخلص الكميه هما هيعملو من 5 ل 6 أرغفه حجم وسط واخلي كل رغيف في ورقه الزبده زي ما هو
الصوره ديه هتوضحلكم الفكره
كل العيش فوق بعضو اهو بورق الزبده
ورق زبده
-أجي بقي لمرحله التسويه هجيب طاسه تيفال واسخها كويس جدا جداااا واحط فيها معلقه زيت
طاسه تيفال
-واحط اول رغيف احطوا ازاي بقي ركزوا معايا لانكم لو شلتوه بأيديكم هيبوظ لأنو رفيع جداا فهشيلو بورق الزبده بتاعته احطه بالتيفال مقلوب بحيث يكون الرغيف تحت وورق الزبده فوق
تسويه الخبز
-وابدأ أشيل ورقه الزبده براااحه
اشيل ورق الزبده
-ولمي يبدا يعمل فقاقيع اقلبو علي الناحيه التانيه
هنا بدا يبقلل :))
خبز
-وهنا قلبتو
اقلبو
-طبعا التسويه بتكون في الاول علي نار عاليه واما يبدأ يستوي اخلي النار متوسطه وبعد ما أشيل أول رغيف أبدأ أعلي النار اسخن الصينيه تاني كويس واحط الرغيف اما يدخل في السوا اخلي النار متوسطه ولو احتجت احط زيت بين كل رغيف والثاني حطوا بس مش تكتروا
واطلعهم احطهم فوق بعض عشان يفضلوا طراي مش ينشفوا
خبز الصاج
-شايفين العيش بيثني اهو وطري
خبز طري
-لمي الخبز يدفي خاالص اضعو في فوطه نضيفه او احطو فكيس عشان مينشفش
فوطه
-وبس كدا ودوقو أحلي خبز بجد طعموا راااائع وممكن نعمل بيه ساندوتشات او حتي نغمس بيه في الفطار او العشا وبالهنا والشفا :))
خبز الصاج
-والي اللقاء في موضوع أخر بأذن الله 🙂 في أمان الله 🙂

Post Author: Basma

مؤسس ومديرة الموقع الإلكتروني تيستي فوود

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *