تشيز كيك الفراوله البارد

السلام عليكم ورحمه الله وبركاته النهارده ان شاء الله هقدملكم وصفه سهله جدا جدا للتشيز كيك ومش بتاخد وقت وسريعه وعلي البارد ومضمونه بأذن الله ومفيده جدا للاطفال عشان الجبنه اللي فيها وهيحبوها كمان يالا نبدأ:
المقادير:
اولا مقادير طبقه البسكوت:
-بسكويت دايجستف وزبده
ثانيا مقادير طبقه التشيز:
-250 جرام جبنه كيري(14 حبه)
-250 جرام كريمه لباني
-كيس جيلي فراوله
-معلقتين اكل سكر بودر او سكر عادي
ثالثا مقادير الطبقه العلويه:
-كيس جلي فراوله،كوب ونص ماء
الطريقه:
-الاول نعمل طبقه البسكوت هنجيب الصينيه اللي هنعمل فيها التشيز كيك انا حطيت فيها ورق زبده من تحت عشان اما اقطع التشيز كيك مجرحش الصينيه

المهم هنجيب الصينيه هنحط فيها بسكويت بحيث يملي القاعده زي الصوره

-والزبد ه ملهاش مقدار محدد ممكن مثلا معلقه كبيره زبده هنسيحها بالميكرويف

-نحط البسكويت في كيس ونكسره بالنشابه او اي حاجه بلاش نطحنوا بالكبه تكسيره احسن عشان تطلع طبقه البسكوت فيها شويه قرمشه وبعدين هنحط عليه الزبده السايحه ونقلبوا كويس لحد ما نحسوا بقي عامل زي الرمله لو حسيتي الزبده قليله ممكن تزودي المهم انوا يبقي بالاخر شبه الرمله مش معجن بالزبده زي الصوره

-هنحط طبقه البسكوت في الصينيه وهنضغط عليها كويس ونسويها بأيدينا وبعدين ندخلو الثلاجه لحد ما نجهز طبقه التشيز

-ثانيا هنعمل طبقه التشيز وديه مقادير طبقه التشيز

-هنحط الجبنه في وعاء خفق ونضربها كويس

–

وبعدين نحط عليها السكر ونضربها كويس (هنا حطيت السكر)

-نضربهم كويس لحد ما قواهم يكون زي الصوره

-وبعدين نحط الكريمه

-ونضرب كويس لحد ما تتجانس بالخليط والخليط يتقل زي الصوره اول ما يتقل شويه نوقف الضرب

-نحط باكو الجيلي في كوب وفي نفس الكوب نزود ميه مغليه ونقلب كويس عشان الجلي يذوب

-ونحط كوبايه الجلي علي الخليط ونضرب لحد ما الخليط يتجانس

-نصب الخليط بالراحه علي طبقه البسكوت

-ونساوي السطح وندخل التشيز كيك الثلاجه تبرد علي الاقل ساعتين

-بعد ساعتين نطلع التشيز كيك من الثلاجه ونعمل جيلي عادي زي ما مكتوب علي العلبه بس بدل ما نعملو بكوبيتين هنعملو بكوب ونص ميه ونحطوا علي التشيز كيك بالراحه وندخلو الثلاجه يجمد علي الاقل ساعتين برضو
-هنا لمي جمد وطلع من الثلاجه