البيتزا الأيطالي واسرار نجاحها بالتفصيل

البيتزا
ا
لمقادير
(اولا مقادير العجين):(هذه المقادير تكفي لعمل من 4 الي 5 صواني حجم متوسط )

-4 أكواب دقيق
-ثلاثه معالق اكل لبن بودر(يمكن الأستغناء عنه)
-خمس معالق اكل زيت زيتون
-معلقه اكل زبادي(يمكن الأستغناء عنها )
-معلقتين شاي خميره فوريه
-معلقه شاي سكر
-رشه ملح
-معلقه شاي ونصف زعتر(يمكن الأستغناء عنه)
-نصف ملعقه شاي ثوم بودر(يمكن الأستغناء عنه)
-القليل من السميد لفرد العجين(يمكن الأستغناء عنه ولكن جوبوه اذا توفر عندكم)
(طبعا هتقولولي انتي كل المقادير كاتبه جمبها يمكن الأستغناء عنه أمال ايه اللي مش ممكن الأستغناء عنه؟ههههه هقولكم اصل عجينه البيتزا الأيطالي دقيق و زيت زيتون وسكر وملح وخميره وشكرا وبعملها كده كتير وبتطلع جميله بس في بعض الأضافات بتنكه العجينه زي الثوم والزعتر واللبن البودر بيديها شويه قيمه غذائيه والزبادي بيدي طراوه للعجينه بس من غير الأضافات ديه بتطلع العجينه ناجحه وجميله وأنا مجرباها أكتر من مره)

مقادير البيتزا
ثانيا مقادير الحشو:
-كفته و سوسيس مقطع او اي اي حشو حسب ذوقك
-طماطم مقطعه وياريت تبقي جامده شويه ولو طريه نقطعها ونشيل اللب من جوه عشان مش عاوزين اي ميه بالعجينه
-فلفل مقطع
-زيتون مقطع
-جبن مودزريلا
ثاالثا مقادير صلصه الطماطم
-صلصه طماطم نصف علبه تقريبا +معلقه زبده سايحه+زعتر+ثوم بودر+ملح+فلفل اسود
الطريقه

  • اولا نضع معلقتين خميره ومعلقه سكر و قليل من الماء (الدافئ)في كوب ونغطيه ونتركه 10 دقايق يخمر واخر صوره بعد ما خمر وملي الكوبايه

نضع الخميره والسكر ونتركهم يخمروا

  • نخلط في وعاء الدقيق والحليب البودر والزعتر والثوم البودر ورشه الملح

دقيق وحليب بودر وملح وزعتر

  • ثم نقلبهم بملعقه ونضيف زيت الزيتون وملعقه الزبادي(متكنش ساقعه)انا بدفيها عشر ثواني بالميكرويف او تكوني مطلعاها من الثلاجه قبلها ونفرك الدقيق والزبادي بالعجينه بأصابعنا

نفرك الزيت والدقيق

  • ثم ضيفي الماء والخميره الي العجينه تم اضيفي ماء دافئ بالتدريج واستمري بالعجن الي ان تتكون عجينه متماسكه واستمري بالعجن عشر دقايق بالعجانه او 15 او 20 دقيق بأيدك في مكان مغلق الي ان تتكون لديك عجينه ناعمه ومطاطه (تكاد تكون بتلزق ولو بتلزق ومش عارفه تتحكمي فيها ادهنيها شويه زيت هتلقيها مبقتش تلزق)شايفين بتشد ازاي  ونغطيها ونتركها  ساعه تختمر في مكان مغلق اي داخل ميكرويف او فرن

نعجن العجينه

  •    في هذه الاثناء لحد ما العجينه تخمر نجهز صلصه الطماطم نسيح معلقه زبده ونضيف عليها صلصه الطماطم والثوم والزعتر والملح والفلفل الأسود ونقلبهم جيدا ولو هتعملي الصلصه بطريقتك حاولي ميبقاش فيها ميه

صلصه البيتزا

    •     ثم نحضر الكفته والسوسيس (انا استخدمت الجاهز) شوحتهم وقطعتهم

حشو البيتزا

  • بعد ساعه اما العجينه تخمر ممكن تقسميها كور وتخمريها تاني وديه خطوه اختياريه يمكن الأستغناء عنها

هنا لمي العجينه خمرت
العجينه خمرت

    • كده عننا كل حاجه جهزت العجينه والحشو والصلصه نبدأ بقي الشغل 🙂

بيتزا جامده

  •  هنجيب صينيه احسن صينيه سويت فيها البيتزا التيفال بتدي لون جميل انا بستخدم طاسه عادي واغلف ايديها بورق فويل وادخلها الفرن عادي بدهنها شويه زيت زيتون وارشها بدقيق سميد وافرد العجينه جواها بسمك رفيع واخرمها بالشوكه عشان متنفش واحط الصلصه وبعدين شويه جبن مودزريلا عشان الحشو يلزق واحط الحشو احط مش كتير وبعدين اسيب البيتزا تخمر كمان نص ساعه هتدي نتيجه افضل لو خمرتيها بعد التشكيل ممكن مش تخمريها بس انا بقولك علي افضل النتائج ازاي توصليلها خلال بقي التخمير هشغل الفرن قبل ما ادخل البيتزا علي اعلي درجه ب 15 او 20 دقيقه لازم الفرن يبقي سخن اوي واحط البيتزا في الفرن تحت خالص واسيبها تستوي لو فرنك حامي مش هتاخد 5 دقايق هي بتاخد من 5-10 دقايق وكل ما تاخد وقت اقل بالفرن كل ما تبقي احسن واطري  ولمي تستوي بطلعها واحط الجبن المودزريلا وادخلها تحت الشوايه من فوق الجبنه تسيح بس

البيتزا الجامده

    • هنا البيتزا بوريكم ازاي لمي بتنيها مش بتتقطع عشان هي طريه

بيتزا طريه

  •     وديه لونها من تحت والجبنه اللي بتشد طبعا زي الأعلانات ههههههه

بيتزا خطيره

  •    وشوفوا الصوره ديه اللي عاوزه بيتزا محشيه الأطراف (حشيتها جبن مودزريلا) وحطيت كورن فليكيس في الجوانب عشان تبقي كرسبي

بيتزا محشوه الاطراف

في النهايه عاوزه الخصلكم سر او اسرار نجاح البيتزا
1-انها تتخدم كويس بالعجن يعني تعجنيها كويس
2-انها تخمر كويس قبل وبعد التشكيل
3-انك تحطي دقيق سميد في الصينيه مع الزيت بتدي نتيجه رائعه وأنها متبقاش تخينه وتخرميها عشان متنفش
4-أن الحشو وصلصه الطماطم ميكنش فيهم ميه عشان العجينه مش تعجن
5- أنك تحطي الجبن المودزريلا قبل الحشو بين صلصه الطماطم والحشو عشان الحشو يلزق بالعجين وباقي كميه الجبن تحطيها بعد ما البيتزا تستوي
والنيتجه بأذن الله هتكون رائعه 🙂 وبالهنا والشفا
البيتزا
والي اللقاء في موضوع أخر بأذن الله 🙂 في أمان الله 🙂

Post Author: Basma

مؤسس ومديرة الموقع الإلكتروني تيستي فوود

12 thoughts on “البيتزا الأيطالي واسرار نجاحها بالتفصيل

    lolo gabr

    (12 سبتمبر، 2014 - 1:12 صباحًا)

    خطوات كلها في منتهي الدقه وبجد تسلم اﻵيادي

      Basma

      (17 سبتمبر، 2014 - 8:20 صباحًا)

      تسلمي يا جميل

    Nadia Farid

    (7 أكتوبر، 2014 - 10:29 صباحًا)

    فعلا برافو عليك * وماشاء الله عليك * أنا بعمل البيتزا من زمان وعارفة الأسرار دى كلها او معظمها * لكن الرائع فى الموضع طريقة شرحك لها بالتفاصيل الدقيقة * حتى إنك بتردى على التساؤلات وكأن الشخص أمامك مباشرة * بدليل تعليقك على جملة ( يمكن الاستغناءعنه ) حسيت إنك سمعتى تعليقى وانا أقرا الوصفة وإنك بتردى على ** فعلا إما ان يكون التمكن هكذا يا بلاش * فيه ناس كتير بتعرف تعمل الأكلات لكن مش كل واحد يقدر يوصل المعلومة بدقة مثلك ** أشكرك جدا وبالتوفيق * آسفة على الإطالة يمكن عشان أول مرة أعلق عندكم * لكن واجبى دفعنى لأشكرك فيجب ان نشجع ونجيد فى ذلك مثلما نجيد فى النقد بكل سهولة ** إلى الأمام دائما .

      Basma

      (7 أكتوبر، 2014 - 5:30 مساءً)

      انا بجد عاجزه عن الرد عن كلامك الجميييل ده كلك ذووق تسلمي

    salwa mansour

    (26 أكتوبر، 2014 - 3:48 صباحًا)

    مش هاقدر اقول يا بوسي سوي ان اكلك جميل زيك

      Basma

      (26 أكتوبر، 2014 - 10:07 صباحًا)

      حبيبتي ربنا يخليكي :))

    Snow Queen

    (3 ديسمبر، 2014 - 5:48 مساءً)

    ما شاء الله جمييييييلة .. هجربها النهاردة بإذن الله واقولك 🙂

      Basma

      (7 ديسمبر، 2014 - 7:41 صباحًا)

      تسلمي 🙂 ايه الاخبار جربتيها؟

    الهام

    (23 فبراير، 2018 - 10:27 مساءً)

    الله يسلمك و يخليك حبيبتي شكراااااااااااات

      Basma

      (30 مارس، 2018 - 12:49 مساءً)

      😍😍🌹

    الهام

    (23 فبراير، 2018 - 10:28 مساءً)

    الله يباركلك و يخليك

      Basma

      (30 مارس، 2018 - 12:48 مساءً)

      تسلمي

اترك رداً على Basma إلغاء الرد

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.