اصابع الجبن او التشيز تيكس

التشيز تيكس
ا
لسلام عليكم ورحمه الله وبركاته النهارده ان شاء الله هقدملكم وصفه بجد رائعه ونتيجتها مش هتصدقيها بس التزمزا بالطريقه والمقادير وهي اصابع الجبن او التشيز تيكس او ممكن نقول عليها بيتزا الجبن والعجينه انا مألفاها او ممكن نقول نقول مقتبساها من عجينه العشر دقايق مع بعض التعديلات اللي بتخليها مميزه وقوامها رائع وممكن تستخدم للبيتزا العاديه او المناقيش يالا نبدأ
المقادير:
بما ان العجينه مقتبسه من العشر دقايق فالمقادير هتكون علي مجموعتين برضو
المجموعه الأولي:
-كوب لبن دافي (دافي يعني مش سخن ولا ساقع )-كوب دقيق-معلقتين صغيرتين خميره-معلقه صغيره سكر-ربع معلقه ملح
مقادير المجموعه الأولي
-الأضافه بقي في مقادير المجموعه الأولي عن عجينه العشر دقايق(معلقه صغيره زعتر-من ربع لنص معلقه صغيره ثوم بودر حسب ما بتحبو نكهتوا)
زعتر وثوم
ثانيا مقادير المجموعه الثانيه:
المجموعه الثانيه مقاديرها هي اللي مختلفه عن العشر دقايق
-كوب ونص دقيق ابيض-ربع كوب دقيق اسمراو ممكن رده لو معندكيش استعملي دقيق ابيض بس الاسمر هنا هيدي قوام وطعم للعجينه احسن -نصف معلقه صغيره بيكنج بودر-معلقه اكل  خل (ده هيعمل كمحسن للعجينه ومتخافوش مش بيبان ابدا بس استخدامو هيفرق في ليونه ومطاطيه العجينه-بيضه(مهمه جدااا )-معلقتين اكل زيت زيتون
مقادير المجموعه الثانيه
ثالثا مقاير الحشو:
-جبن مودزريلا-جبن شيدر-زبده
الطريقه:
-نضع مقادير المجموعه الاولي(كوب دقيق وكوب حليب دافي والخميره والسكر والزعتر والثوم البودر في وعاء ونقلبهم كويس ونغطيهم ونسيبهم يخمروا علي الاقل 15 ل 30 دقيقه)
نسيبهم يخمروا
-هنا بعد ما خمروا واضح طبعا انهم خمروا
بعد التخمير
-وبعد ما يخمروا هنحطهم في وعاء العجن او علي رخامه لو هتعجني بأيدك وهنحط عليهم  البيضه ونعجن شويه وبعدين نضيف الدقيق الابيض والاسمر والبيكنج بودر ونستمر بالعجن
نضيف البيض والدقيق ونعجن
-في الاخر هضيف معلقتين طعام زيت زيتون ومعلقه طعام خل واعجن علي الأقل 7 دقايق بالعجانه او من عشر دقايق لربع ساعه بأيدي كل ما مده العجن تزيد كل ما العجينه هتنجح
نضيف الزيت والخل
-قوام العجينه في الاخر المفروض يلزق شويه (ممكن قوامها يختلف حسب نوع الدقيق بس اتصرفوا لو لقيتوها جامده زودولها شويه ميه دافيه سايحه جامد ضيفولها دقيق المهم قوامها في الاخر يكون طري وشويه بيلزق)نحط علي ايدينا زيت زيتون ونلمها ونغطيها ونسيبها تخمر تاني عشر دقايق وهنا قوامها بعد ما دهنتها بالزيت
قوام العجين
-بعد ما تخمر عشر دقايق تاني هجيب صينيه الفرن احط عليها ورق زبده وارشها دقيق اسمر مش موجود يبقي دقيق ابيض معندكيش ورق زبده حطي في صينيه زيت ورشيها دقيق برضووافرد العجينه عليها بأيدي او النشابه النشابه هتديني سمك ارفع وكل ما تبقي رفيعه كل ما تبقي احسن بس لو مفيش نشابه نفردها بأيدينا عادي ونخرمها بالشوكه عشان متنفش بالفرن
نفرد العجين
-وبعدين هنحط علي العجينه قطع زبده صغيره(الخطوه ديه مهمه جدا جدا هتديكي طعم ولون وقوام حلو اوي للعجينه اما تستوي)
نضع قطع الزبده
-وبعدين هنحط جبن شيدر لو عندك مبشور حطي معندكيش حطي شيدر شرايح مقطعه زي ما انا عملت بس انا مش كترت الشيدر حطيت شريحه واحده لاني مش بحب الشيدر اوي وممكن تستعني عن الجبن الشيدر
نضع الجبن الشيدر
-ممكن بقي في الخطوه ديه ترشي حبه ملح علي العجين كأنك بترشي علي بيض مقلي بس مش تكتري الملح لو عاوزاها للاطفال متحطيش ملح احسن بس الملح بيديها طعم احسن بس مش نكتر وده حسب رغبتك وبعدين حطي طبقه حلوه كده من المودزريلا
نضع المودزريلا
-وبعدين ندخلها الفرن نكون مسخنينوا قبلها بربع ساعه علي اعلي درجه(زي ما اتفقنا في المعجنات او الكيك لازم الفرن يكون متسخن قبلها من عشره دقايق لربع ساعه)ونحطها بالرف(الوسط) ولو رفيعه مش هتاخد عشر دقايق بالفرن ولمي تستوي افتحوا الشوايه عليها تاخد لون زي كده
نفتح الشوايه
-طبعا اللون الجميل ده بسبب الزبده اللي حطناها ونقطعها اصابع بالطول او زي البيتزا لو حابين مثلثات
نقطعها اصابع
-هنا شكل الاصابع شايفين رفيعه ازاي
التشيز تيكس
اصابع الجبن
-هنا من تحت الدقيق اللي بنرشو تحت بيعمل شغل جاامد 🙂
بيتزا الجبن
بصو بتتني ازاي منغير ما تشقق او تتقطع ده دليل انها طريه جدا وفيها ليونه وده بسبب الخل اللي بالعجينه وتخميرها وعجنها كويس
بيتزا طريه
-ودوقوا احسن بيتزا طريه لذيذه والزعتر والثوم اللي بالعجينه بيدوها طعم راااااااائع وتنفع كمقبلات او فطور او عشا ومغذيه جدا للاطفال لانها مليانه كالسيوم لبن وبيض وجبنه وهيحبوها وبالهنا والشفا:))
-انا بعمل الكميه ديه وبسوي منها جزء والجزء الباقي بحطوا بالثلاجه وتاني يوم اطلعوه اشكلو واسويه والمقادير ديه تعمل دايرتين كبار وواحده صغيره جربوها وان شاء الله هتعجبكم
-والي اللقاء في موضوع اخر بأذن الله 🙂 في أمان الله 🙂

Post Author: Basma

مؤسس ومديرة الموقع الإلكتروني تيستي فوود

2 thoughts on “اصابع الجبن او التشيز تيكس

    داليا

    (24 أبريل، 2014 - 12:17 صباحًا)

    تسلم ايدك جميلة اوي

      Basma

      (3 يونيو، 2014 - 4:54 صباحًا)

      تسلمي

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *